Guddiga Olombikada Soomaaliyeed ee GOS ayaa si weyn ugu hambalyeeyey Kooxaha Nugaal iyo Guul wade oo ku kala guuleeystey Koobabkii Gobolada Puntland iyo xaafadaha KIsmaayo,iyadoo war saxaafadeed laga soo saarey xafiiska Olombikada lagu amaaney doorka horumarineed ee maamulka Puntland kaga jiro kor u qaadista ciyaaraha gaar ahaan kubadda cagta,taasi oo muujisey ifafaalo ah in la heli karo ciyaartoy tayo leh oo meteli kara xulka qaranka Soomaaliya.

Duraan Faarax oo ah xoghayaha guud ee GOS oo ku saxiixnaa war saxaafadeedka GOS ayaa sheegay in Maamulada dalka ay ku deydaan maamulka Puntland oo diyaariyey tartan aad u qurux badan oo ay ka qeyb qaateen dhalinyaro aad u tiro badan oo leh xirfad ciyaareed,kuwaasi oo door weyn ka ciyaari kara soo celinta nabadda iyo metelida xulka qaranka Soomaaliyeed.

"waa in Xiriirada heer qaran ay ku dadaalaan iney siiyaan fursado dhalinyarada Soomaliyeed oo ku kala nool gobolada dalka, qaabka ay u diyaariyeen tartankaan Puntland waxay ku tuseysaa in laga heli karo naadiyo heer qaran ka tartami kara haddey helaan fursadaha ay u baahan yihiin”ayuu raaciyey duraan.

Gudiga Olombikada Soomaliyeed ee GOS ayaa dadaal balaaran ugu jirta sidii halka uu fadhiyo looga qaadi lahaa noocyada kala duwan ee Isboortiga dalka,iyagoo seminaaro,dhinaca aqoonta maamulka Sportiga,xagga farsamada iyo Qabashada tartamada kala gedisan gaarsiiya dhamaan Gobolada dalka inta suurta galka ah.