Waxaa magaalada Khartuom ee caasimadda dalka Sudan lagu soo gabo-gabeeyey shir-sanadeedkii ANOCA Zone V kaasii oo maalmihii ugu danbeeyay halkaasi ka socodey ayna goob-joog ka ahaayeen dhamaan dalalka xubnaha ka ah ANOCA Zone V oo Soomaaliya kamid tahay.

Shirweynaha ayaa socdey 18 ilaa 21-ka bishan December waxaana xafladii furitaanka kasoo qeybgalay Kaaliyaha Madaxweynaha dalka Sudan Cabdu-Raxmaan Sadiiq Al Mahdi,Wasiirka Dhalinyarada iyo Isboortiga dalka Sudan iyo masuuliyiin kale oo ka socotay xukuumadda martida loo ahaa ee Khartoum.

 

Cabdu-raxmaan Al Mahdi oo halkaasi ka hadlay ayaa sheegey inuu aad ugu faraxsan yahay Shirweynahan dalkiisu marti geliyey,isagoo xusey in Madaxweynaha dalka uu aad u jecelyahay in Sportigu qaaradda Horumar ku talaabsado.

 

Shirka ayaa ajan-dayaashiisa waxaaa kujirey sidii dalalkan xubnaha ee Zone V isugu xirnaan lahaayeen,maadaama uu Zone-kan yahay midka ugu balaaran,isla markaana cayaartoydiisu yihiin kuwa biladaha ugu badan ka keena tartamada caalamka ka dhaca.

Waxaa sidoo kale laga hadlay sida ugu macquulsan ee Zone-ku u yeelan lahaa qorshe howleed uu ku dhaqaaqi lahaa sanadaha soo socda,maadaama uu zone-ku ka liitey xagga Hogaaminta qaarad ahaan,iyo isku xirnaan la’aanta iyo ka warqabta cayaaryahanada tirada badan ee guulaha usoo hoya dalalka Zone V ku mideysan.

 

Ugu danbeyntii waxaa halkaasi lagu doortey Guddiyo kasoo shaqeeya Qorsha hawleedka uu ku howl geli lahaa Zone-ka sanadaha soo socda si loo dar-dar geliyo dhaq dhaqaaqa iyo horumarinta Olympicska dalalka Zone-ka ku mideysan waxaana Guddiga loo xilsaaray kujira Xoghayaha Guud ee GOS Duraan Axmed Faarax oo shirkaasi Soomaaliya u metelayey.

C/Xafiid C/Samad Zaciimka

NOCSOM Media-Mogadishu