Tartanka 16-aad Koobka Jen. Daa`uud Ciyaaraha Fudud ee ayaa waxaa ka furmay garoonka Dugsiga Sare Booliska [Scuola Plozia] ee Magaalada Muqdisho, waxaana lagu wadaa inuu socda 21-24/12/2010 iyadoo lagu tartamayo qeybaha kala duwan ee ciyaaraha fudud. Xafladda furitaanka oo ayaa waxaa  ka soo qeybgaleen mas`uuliyiin kala duwan, waxaana ugu horeyn ka hadlay kusimaha Guddoomiyaha ahna Guddoomiye ku xigeenka XSCF Drs. Khadiijo Aadan Daahir, waxayna tibaaxday in koobka Jen. Daa`uud ee Ciyaaraha Fudud uu yahay tartan qiimo weyn ku fadhiya, waxayna ku dartay inay  ciyaaryahanada u tahay fursad ay ku muujiyaan awoodooda dhinaca ciyaaraha Fudud xiriirkuna uu qiimeyn doono orodyahanada ku Guuleysta tartankan. Sidoo kale waxaa halkaasi ka hadlay Guddoomiye ku xigeenka  GOS Xasan Axmed Cabdi [Elman] wuxuuna tilmaamay  muhiimadda Isboortiga iyo sida loogu baahan yahay in la kordhiyo  qabashada tartamada iyo horumarinta ciyaaraha wuxuuna XSCF ku amaanay sida weyn ee uu ugu dhabar adeegay qabashada tartamada.  ugu danbeyntii wuxuu ku dhawaaqay tartanka inuu furan yahay. Si kastaba,  Xiriirka Soomaaliyeed ee Ciyaaraha Fudud  ma`aha markii ugu horeysay ee  ay qabtaan tartarmo noocan oo kale ah waxaana lagu tilmaamaa xiriirada ugu firfircoon ee dhaqdhaqaaq ka sameeya  caasimadda magaalada Muqdisho oo ay hareeyeen dagaalo. Xafiiska Warbaahinta GOS