Shalay gellinkii dambe ayaa waxaa magaalada Muqdisho lagusoo gaba gabeeyay tartamo isboorti oo muddo 2 maalmood ah soconayay kuwaas oo guddiga Olombikada Soomaaliyeed uu ku weyneynayay maalinta Olombikada aduunka ee Olympic Day. Munaasabada Olombikada aduunka ayaa waxaa lagu xusay cayaaro noocyo kala duwan ah sida: Kubada cagta, Cayaaraha Fudud, Karatee ,Tekwaanduga,Hidaha yo dhaqanka, xarig jiid iyo kuwo kale oo fara badan.
Intaas ka dib guddoomiyaha Xiriirka Soomaaliyeed ee kubada Gacanta ahna guddoomiyaha gudidga qaban qaabada xuska maalinta Olympic day Md. Maxamed Xuurshe Xasan [Eenoow] ayaa sheegay in munsaabadan oo socotay muddo labo maalmood ay ku soo bandhigeen xiriirada iyo bahda isboortiga dabaaldeg-yo iyo ciyaaro lagu weyneynayo maalinta Olambikada Adduunka, wuxuuna sheegay in sanadaha soo socda ay GOS u qorsheysan tahay inay ka sii qurxiyaan hanaanka munaasabada sida haatan loogu dabaal-degay.
Guddoomiyaha Xiriirka Soomaaliyeed ee Feerka Xaaji Maxamed Axmed Coloow oo ku hadlay magaca guddoomiyaha GOS ayaa sheegay inay farxad u tahay sida wanaagsan ay dadka Soomaaliyeed uga qeybqaateen munaasabadan caalamiga ah, wuxuuna sheegay in tani cadeyn u tahay in shacabka Soomaaliyeed ay yahiin dad Isboorti."Waxaan u mahadcelinaynaa IOC, Youth Link, Shirkadda Telcom Somalia, dadweynaha Soomaaliyeed ee Isboortiga jecel, warbaahinta iyo dhamaan intii gacanta lama iloobaanka ka gaystay maalintan qaaliga, waxaana isku soo baxyadii, dabaal-degyadii iyo tartamadii aan qabanay muujinaysaa inaan nahay shacab Isboorti" ayuu ku soo xiray Md. Xaaji Coloow. Guddoomiyaha Degmada Waberi Axmed Meyre Makaraan ayaa dhinaciisa sheegay inuu ku faraxsan yahay howlaha Isboorti ee dalka ka soconaya waqtigan adag iyo sida weyn ay maalinta Olympicda ay shacabka Muqdisho ugu soo baxeen, wuxuuna sheegay in maamulkooda markasta u taagan yahiin dhiirigelinta Isboortiga.
Munaasabadda Olambikada Adduunka oo sanad walba 23ka June laga xuso dalalka Caalamka ayaa waxaa sanadkan uu yahay sanadkii saddexaad ee lagu soo koobay Olympic Day iyadoo hore loo oran jiray (Olympic Day Run), guud ahaan munaasabaddan ayaa waxaa caasimadda Soomaaliya ee Muqdisho looga xusaya si weyn.
Waxaa goob joog ka ahaa munaasabadii xuska maalinta Olombikada aduunka Maamulka Degmada Waberi, Mas`uuliyiin ka socotay xiriirada kala duwan sida Kubadda Cagta, K/Koleyga, Gacanta, Laliska iyo Feerka Maxamed Axmed Coloow (Xaaji Coloow), Saciid Maxamed Nuur [Mugaanbe], Ibraahim Xuseen Cali [Roombo], Maxamed Xuurshe Xasan [Eenoow], Prof. Maxamed Cali Caddoow guddoomiye ku xigeenka 1-aad ee cayaaraha Fudud Marwo Khadiijo Aadan daahir iyo masuuliyiin kale.
Somali NOC Media Department
GOS oo xustay maalinta Olombikada aduunka
Shalay gellinkii dambe ayaa waxaa magaalada Muqdisho lagusoo gaba gabeeyay tartamo isboorti oo muddo 2 maalmood ah soconayay kuwaas oo guddiga Olombikada Soomaaliyeed uu ku weyneynayay maalinta Olombikada aduunka ee Olympic Day.