Ayadoo laga duulayo ahmiyadda siyaasadeed ee GOS ayaa waxaa magaalada Kismayo ku sugnaa maalmihii la soo dhaafay wafdi isugu jira maamulada sport ga kala gedisan ee dalka oo uu horkacayey xoghaya Guddiga Olimbikada Soomaaliyeed si ay ugu kuurgalaan hawlaha sport ee gobolada jubooyinka. Xoghaya oo ay wehliyaan madax ka socota xiriirka kubadda cagta iyo maamulka sport ga gobolka Banaadir ayaa waxa uu safarkoodu ku saabsanaa sidii loo dardar gelin lahaa hawlaha lagu qaramaynayo siyaasadda olimbikada dalka isla markaana gobolada oo dhan loogu gaarsiin lahaa hawlaha horumarineed ee ay wadaan GOS iyo xiriirada dalka. Shalay ayuu xoghayuhu kala qaybgalay bahwaynta sport ga Kismayo doorashadii madaxda xiriirka K Cagta ee gobolka ayadoo ay ku wehliyeen madax ka socotay XSKC si ay ugu muujiyaan taageeradooda taasoo guddoomiye loogu doortay Burhaan Kukuuyo. Xoghayaha ayaa mudadii uu joogay Kismayo kula kulmay qaybaha kala gedisan ee gobolka gaar ahaan bahda sport ga oo isugu jiray kuwii hore iyo jiilka cusuba wuxuuna kala hadlay horumarka sport ga gobolka asagoo dhinaca kale qalab sport ku guddoonsiiyey maamulka sport ga. "Waxaan Kismaayo u nimid sidii aan ula qaybsan lahayn horumarinta sport ga ee uu GOS ka wado dalka, qaybtooda uga qaadan lahaayeen isla markaana aan ugala tashan lahayn sidii loo haqabtiri lahaa baahiyadooda ku aadan qalabka sport ga, waxaanan kula kulanay magaalada dad u heelan sidii ay goboladan dib ugu celin lahaayeen heerarkii ay sport ga dalka uga jiri jireen isla markaana ula jaan qaadi lahaayeen maamulada sport ga dalka" ayuu yiri xoghayaha GOS Duraan Axmed Faarax oo la hadlayey warfidiyeenada ku sugan magaaladaasi Kismaayo. "Waxaan dooneynaa inaan hirgalino qorshe hawleedkeena ay muhimadihiisa ka midka yihiin kor u qaadista aqoonta maamulayaasha sport ga, ka qeybgalka tartamada caalamiga si tayeysan, xoojinta grassroots sportiga, qurxinta image ka maamulada sportiga iyo u isticmaalka sportiga nabadeynta iyo is dhexgalka bulshada, taasna lama hirgalin karo haddaan laga qeyb galina gobolada dalka oo idil" "Qalabkan aan guddoonsiinay maanta iyo waliba kan uu maamulka gobolka Banaadir ugu deeqay gobolkan intuba maahan kuwa dabooli kara baahida aan ku aragnay halkan balse waa bilow waxaanan filaynaa in aan kulamo kale iyo safaro dambe ku nimaano magaaladan isla markaana aan qayb libaax leh ka qaadano sidii dib loogu soo celin lahaa magacii ay Jubada Hoose ku lahayd sport ga dalka" ayuu raaciyey xoghaye Duraan oo ku qanacsanaa hamiga, dadaalka iyo sport jacaylka bulshada reer Kismaayo ee ay kula kulmeen magaaladaasi. Qorshaha siyaasadeed ee GOS ayaa waxaa lafdhabar u ah gaarsiinta hawlaha horumarineed ee sport ga dhamaan gobolada dalka waxaana ay talaabadaani dhiirigelin u tahay dhamaan bahwaynta sport ga goboladan Jubooyinka ayadoo sidoo kalena kalsooni ku abuuraysa gobolada kale ee aan wali la tagin balse qorshaha ku jira